Prezident
İlham Əliyevin 2020-ci il 2 dekabr tarixli Sərəncamına əsasən təsis edilən 27
Sentyabr - Anım Günü Vətən müharibəsində qəhrəmancasına döyüşmüş, ölkəmizin
ərazi bütövlüyü uğrunda canlarından keçmiş əsgər və zabitlərimizə, bütün
şəhidlərimizə dərin ehtiramın ifadəsidir.                           Anım
Günündə ölkəmizin hər yerində olduğu kimi, xocalıların kompakt şəkildə
müvəqqəti məskunlaşdıqları Goranboy rayonunun Aşağı Ağcakənd qəsəbəsində
şəhidlərin xatirəsi ehtiramla anıldı.Rayon
icra hakimiyyətinin və hüquq-mühafizə orqanlarının rəhbərliyi, şəhid ailələri
və qazilər, ictimaiyyət nümayəndələri qəsəbədə Xocalı soyqrımı qurbanlarının
xatirəsinə ucaldılmış Ana harayı abidəsini ziyarət edərək önünə gül dəstələri düzdülər. Mərasim
iştirakçıları əvvəlcə torpaqlarımızın ərazi bütövlüyü uğrunda canlarını fəda
etmiş şəhidlərimizin ruhunu bir dəqiqəlik sükutla yad etdilər.        Xocalı
rayon İcra Hakimiyyəti başçısının müavini,
İctimai-siyasi və humanitar məsələlər şöbəsinin müdiri Lamiyə Qarayeva tədbiri giriş sözü ilə açaraq Vətən müharibəsində
əldə etdiyimiz şanlı qələbədən danışdı. Bildirdi ki, torpaq su ilə qarışarsa palçıq, qan ilə qarışarsa, Vətən olar. 44 günlük
haqq savaşımızda qəhrəman oğullar canlarını fəda edərək ən ali məram olan
şəhidlik zirvəsinə ucaldılar. Vətən müharibəsində dastana çevrilmiş qələbəmizə bütün dünya heyrət edir. Ömrümüzün
sonunadək bizə qələbəni yaşadan şəhidlərimizə, onların ailələrinə, övladlarına
borcluyuq.Sonra "Xocalı
Rayon Mərkəzi Xəstəxanası" publik hüquqi şəxsin direktoru Aqil Məmmədov çıxış
edərək iki il bundan əvvəl erməni təxribatına qarşı Azərbaycan ordusunun
başlatdığı əks hücumundan qürur hissi ilə danışdı. O, qeyd etdi ki, bu gün
şəhidlərimizin anım günü olması ilə yanaşı, həm də bizim qürur günümüzdür.
Milli birlik günümüzdür. Çünki 2020-ci illin 27 sentyabrında Azərbaycan xalqının bütün zümrəsi bir yumruq kimi
birləşərək ordumuza dəstək oldu. Milli birliyimiz sayəsində, şəhidlərimizin
qanı və canı hesabına 30 il ərzində düşmən tapdağı altında qalan torpaqlarımızı
azad etdik. Şükürlər olsun ki, bu gün Azərbaycan bayrağı işğaldan azad edilmiş
bütün torpaqlarımızda dalğalanır. Nəyi, necə və nə vaxt edəcəyini yaxşı
bildiyini söyləyən Ali Baş Komandanımızın rəhbərliyi ilə xalqımız böyüz zəfərə
imza atdı.  Daha
sonra Vətən müharibəsi iştirakçısı, qazi İmran Rəcəbova çıxış edərək bildirdi
ki, sentyabr ayını biz tədris ilinin başlanğıcı kimi qeyd etmişik. Ancaq
2020-ci ilin sentyabrın 27-dən və 2022-ci ilin sentyabr ayının 12-si və 13-ü
tarixlərindən sentyabr ayı şəhidlərimizin anım günləri kimi yaddaşa yazılır. Bunu
da yaxşı bilirik ki, sentyabr ayı bizim qələbəmizə - 30 ildir həsrətində
olduğumuz torpaqların azadlığına gedən yolun başlanğıcıdır. İnşallah Xocalımızı
da düşmən tapdağından azad edəcəyik. O zaman şəhidlərimizin ruhu daha da şad
olacaqdır. Yekun
olaraq çıxış edən rayon icra hakimiyyətinin başçısı Şahmar Usubov 30 il ərzində
keçmiş məcburi köçkünlərin çəkdiyi əzab-əziyyəti, köçkünlük illərinin
əvvəllərində şəraitsiz və gələcəyə ümidsiz şəkildə vaqonlarda, çadırlarda
məskunlaşdıqlarını diqqətə çatdırdı.         Vətən
müharibəsinin ilk günündə Televiziya aparıcısının 8 kəndimizin azad olması
xəbərini verməsi, Cənab Prezidentimizin xalqa müraciəti, qələbə tvitləri bütün
xalqımızı sevincə bürüdüyünü vurğuladı. Bildirdi ki, Böyük zəfəri,
torpaqlarımızın işğaldan azad olmasını görməyi Allah bizlərə qismət etdi. Bu
tarixin şanlı səhifəsini yaşadığımız üçün şəhidlərimizə, qazilərimizə
borcluyuq. Vətən müharibəsində Azərbaycan xalqının yumruq kimi birləşdiyini
gördük. Xalqımızın həmrəyliyini, döyüş əzmini, qisas arzsunu görərkən
azərbaycanlı olmağımızla bir daha fəxr etdik. Hər kəsin arzusu, amalı ordumuzla birlikdə olmaq və torpaqlarımızın
azadlığını görmək idi. Cənab Prezident İlham Əliyev bu gün mötəbər tədbirlərdə öz qətiyyətli
sözünü deyir. Bunu qalib Azərbaycan ordusuna və qalib Azərbaycan xalqına
arxalanaraq deyə bilir. Ölkə başçısının uğurlu siyasəti ilə Qarabağda sürətlə
quruculuq işləri gedir, Bütöv Azərbaycan torpaqlarının bərpası uğrunda
amalımızı həyata keçiririk. 

Allah
bütün şəhidlərimizə rəhmət eləsin, qazilərimizə cansağlığı versin. 

Mərasim
iştirakçıları sonra Aşağı Ağcakənd qəsəbəsinin girəcəyində salınmış Azərbaycan
Bayrağı Meydanı önündə şəhidlərimizin xatirəsinə təşkil edilmiş ağacəkmə
aksiyasında iştirak etdilər. 

 Saat
12:00-da Azərbaycanın ərazi bütövlüyü uğrunda canlarını qurban vermiş Vətən
müharibəsi şəhidlərinin əziz xatirəsi bir dəqiqəlik sükutla yad edildi,
nəqliyyat vasitələrinin və piyadaların hərəkəti dayandırıldı.